ಮಂಗಳೂರು: ಮೂಲದ ಹಿರಿಯ ಇಂಟರ್ವೆನ್ಷನಲ್ ಕಾರ್ಡಿಯಾಲಜಿಸ್ಟ್ ಡಾ. ಪದ್ಮನಾಭ ಕಾಮತ್ ಅವರ “ಕಾರ್ಡಿಯಾಲಜಿ ಅಟ್ ಡೋರ್ಸ್ಟೆಪ್ಸ್” (CAD) ಯೋಜನೆ ಗ್ರಾಮೀಣ ಭಾಗದ ಹೃದಯಾಘಾತ ರೋಗಿಗಳಿಗೆ ತ್ವರಿತ ಚಿಕಿತ್ಸೆ ನೀಡುವ ಮೂಲಕ ಸಾವಿರಾರು ಜೀವಗಳನ್ನು ಉಳಿಸುತ್ತಿರುವ ಮಹತ್ವದ ಆರೋಗ್ಯ ಕ್ರಾಂತಿಯಾಗಿ ಹೊರಹೊಮ್ಮಿದೆ. ಎದೆನೋವು ಬಂದಾಗ ಹಳ್ಳಿಗಳಲ್ಲಿ ತಜ್ಞ ವೈದ್ಯರನ್ನು ತಲುಪಲು 10 ರಿಂದ 13 ಗಂಟೆಗಳ ಕಾಲ ಬೇಕಾಗುತ್ತಿದ್ದರೆ, ಹೃದಯಾಘಾತ ಚಿಕಿತ್ಸೆಗೆ ಅಗತ್ಯವಾದ “ಗೋಲ್ಡನ್ ಅವರ್” ಕೇವಲ 60 ನಿಮಿಷಗಳಷ್ಟೇ ಇರುವ ಹಿನ್ನೆಲೆಯಲ್ಲಿ ಈ ಯೋಜನೆ ಜೀವ ಉಳಿಸುವ ಸೇತುವೆಯಾಗಿ ಕಾರ್ಯನಿರ್ವಹಿಸುತ್ತಿದೆ. ಚಿಕ್ಕಮಗಳೂರಿನ ಕುಗ್ರಾಮದಲ್ಲಿ 32 ವರ್ಷದ ಆಟೋರಿಕ್ಷಾ ಚಾಲಕನೊಬ್ಬ ಸಕಾಲದಲ್ಲಿ ಚಿಕಿತ್ಸೆ ಸಿಗದೆ ಮೃತಪಟ್ಟ ದುರಂತವೇ ಈ ಯೋಜನೆಗೆ ಪ್ರೇರಣೆಯಾಗಿದ್ದು, ನಂತರ ಡಾ. ಕಾಮತ್ ಅವರು ಗ್ರಾಮೀಣ ಆರೋಗ್ಯ ವ್ಯವಸ್ಥೆ, ವೈದ್ಯರು ಮತ್ತು ತಂತ್ರಜ್ಞಾನವನ್ನು ಸಂಪರ್ಕಿಸುವ ದೊಡ್ಡ ಜಾಲವನ್ನು ನಿರ್ಮಿಸಿದರು. ಈ ಯೋಜನೆಯಡಿ ಗ್ರಾಮೀಣ ವೈದ್ಯರು, ನರ್ಸ್ಗಳು ಮತ್ತು ಆರೋಗ್ಯ ಕಾರ್ಯಕರ್ತರು ರೋಗಿಗಳ ECG ಅನ್ನು ವಾಟ್ಸಾಪ್ ಗುಂಪುಗಳಿಗೆ ಕಳುಹಿಸಿದ ತಕ್ಷಣ ತಜ್ಞ ಕಾರ್ಡಿಯಾಲಜಿಸ್ಟ್ ತಂಡವು ಕೆಲವೇ ನಿಮಿಷಗಳಲ್ಲಿ ವಿಶ್ಲೇಷಣೆ ಮಾಡಿ ತಕ್ಷಣದ ಚಿಕಿತ್ಸೆ, ಥ್ರಾಂಬೊಲೈಟಿಕ್ಸ್ ಬಳಕೆ ಮತ್ತು ಮುಂದಿನ ಶಿಫಾರಸುಗಳನ್ನು ನೀಡುತ್ತದೆ, ಜೊತೆಗೆ 24×7 ಉಚಿತ ವಾಟ್ಸಾಪ್ ಸಹಾಯವಾಣಿ (9743287599) ಮೂಲಕ ಮಾರ್ಗದರ್ಶನ ನೀಡಲಾಗುತ್ತದೆ. ಆರಂಭದಲ್ಲಿ ದಕ್ಷಿಣ ಕನ್ನಡ ಮತ್ತು ಉಡುಪಿಯಲ್ಲಿ ಆರಂಭವಾದ ಈ ಯೋಜನೆ ಇಂದು ಕರ್ನಾಟಕದ 23ಕ್ಕೂ ಹೆಚ್ಚು ಜಿಲ್ಲೆಗಳಿಗೆ ವಿಸ್ತರಿಸಿಕೊಂಡಿದ್ದು, 325ಕ್ಕೂ ಹೆಚ್ಚು ECG ಯಂತ್ರಗಳನ್ನು ಉಚಿತವಾಗಿ ಸ್ಥಾಪಿಸಲಾಗಿದೆ ಹಾಗೂ 2,500ಕ್ಕೂ ಹೆಚ್ಚು ಆರೋಗ್ಯ ಕಾರ್ಯಕರ್ತರು ಈ ಜಾಲದ ಭಾಗವಾಗಿದ್ದಾರೆ. ಕೇರಳಕ್ಕೂ ವಿಸ್ತರಿಸಿರುವ ಈ ಸೇವೆ ಜಮ್ಮು-ಕಾಶ್ಮೀರದ ದೂರದ ಸೇನಾ ಪ್ರದೇಶಗಳಿಗೂ ತಲುಪಿರುವುದು ವಿಶೇಷವಾಗಿದ್ದು, ಒಂದು ವಾಟ್ಸಾಪ್ ಮೆಸೇಜ್ ಮೂಲಕವೂ ಜೀವ ಉಳಿಸಬಹುದು ಎಂಬುದನ್ನು ಈ ಯೋಜನೆ ದೇಶಾದ್ಯಂತ ಸಾಬೀತುಪಡಿಸಿದೆ.
About the Author
