ಕರ್ನೂಲು: ವಿಶಾಕಪಟ್ಟಣಂನಿಂದ ಆದೋನಿ ಕಡೆಗೆ ಬರುತ್ತಿದ್ದ ಫಾರ್ಚುನರ್ ಕಾರು ಮತ್ತು ಬೆಂಗಳೂರಿನಿಂದ ಮಂತ್ರಾಲಯದತ್ತ ತೆರಳುತ್ತಿದ್ದ ಶಿಫ್ಟ್ ಕಾರು ಎಮ್ಮಿಗನೂರು ತಾಲ್ಲೂಕಿನ ಕೋಟೆಕಲ್ ಬಳಿ ಮುಖಾಮುಖಿ ಡಿಕ್ಕಿಯಾಗಿ, ಇಬ್ಬರು ಮಕ್ಕಳನ್ನು ಸೇರಿ ಒಂದೇ ಕುಟುಂಬದ ಐವರು ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ದೇವರ ದರ್ಶನಕ್ಕಾಗಿ ಸಂತೋಷದಿಂದ ಹೊರಟಿದ್ದ ಕುಟುಂಬ ದಾರಿಯಲ್ಲಿ ದುರಂತ ಅಂತ್ಯ ಕಂಡಿದೆ. ಡಿಕ್ಕಿಯ ರಭಸಕ್ಕೆ ಎರಡು ಕಾರುಗಳ ಮುಂಭಾಗ ನಜ್ಜುಗುಜ್ಜಾಗಿ ಬಿದ್ದ ದೃಶ್ಯ ಎಲ್ಲರ ಹೃದಯವನ್ನೇ ನಡುಗಿಸುವಂತಿತ್ತು, ಸುದ್ಧಿ ತಿಳಿದ ತಕ್ಷಣ ಎಮ್ಮಿಗನೂರು ಗ್ರಾಮಾಂತರ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಮೃತರೆಲ್ಲರು ಕರ್ನಾಟಕ ಮೂಲದವರೇ ಎಂದು ತಿಳಿದು ಬಂದಿದೆ. ರಾಯರ ದರ್ಶನಕ್ಕಾಗಿ ತೆರಳಿದವರು ದೇವರ ಪಾದ ಸೇರಿದ್ದು ಎಲ್ಲರ ಮನ ಕಲುಕುವಂತಾಗಿದೆ.
