ಹೆಚ್ಚಿನ ಇಳುವರಿ, ಕಡಿಮೆ ಸಕ್ಕರೆ: ಹೊಸ ಭತ್ತದ ತಳಿ ಒಂದು ಕ್ರಾಂತಿಕಾರಿ ಹೆಜ್ಜೆ..!

ಬೆಂಗಳೂರು: ಅಧಿಕ ಇಳುವರಿಯಿಂದ ರೈತರು ಸಂತೋಷಪಡಲಿದ್ದಾರೆ, ಮಧುಮೇಹಿಗಳಿಗೂ ಆರೋಗ್ಯಪೂರ್ಣ ಅಕ್ಕಿ ಸಿಗುವ ಸಂಭ್ರಮ. ಹೌದು, ಹೈದರಾಬಾದ್‌ನ ಭಾರತೀಯ ಭತ್ತ ಸಂಶೋಧನಾ ಸಂಸ್ಥೆಯ ವಿಜ್ಞಾನಿಗಳು ಇಂತಹ ವಿಭಿನ್ನ ಹಾಗೂ ನವೀನ ತಳಿಯ ಭತ್ತವನ್ನು ಅಭಿವೃದ್ಧಿಪಡಿಸುವ ಕಾರ್ಯದಲ್ಲಿ ತೊಡಗಿದ್ದಾರೆ. ಈ ಸಂಶೋಧನೆ ಇನ್ನೂ ಸುಮಾರು ಎರಡು ವರ್ಷಗಳ ಕಾಲ ನಡೆಯಲಿದ್ದು, ಹೊಸ ತಳಿಯ ಭತ್ತವು ಪ್ರತಿ ಎಕರೆಗೆ 9ರಿಂದ 10 ಟನ್‌ವರೆಗೆ ಹೆಚ್ಚು ಇಳುವರಿಯನ್ನು ನೀಡುವ ಸಾಧ್ಯತೆ ಇದೆ. ಇದು ಈಗಿನ 3-5 ಟನ್ ಇಳುವರಿಗಿಂತ ಬಹಳಷ್ಟು ಹೆಚ್ಚಾಗಿದೆ. ಮಧುಮೇಹಿಗಳ ಬಳಕೆಗಾಗಿ ಈ ತಳಿಯ ಅಕ್ಕಿಯಲ್ಲಿ ಗ್ಲೂಕೋಸ್‌ ಅಂಶ ಕಡಿಮೆ ಇರುತ್ತದೆ, ಇದು ರಾಜಮುಡಿ ಅಥವಾ ದುಬಾರಿ ಅಕ್ಕಿಯ ಉತ್ತಮ ಪರ್ಯಾಯವಾಗಲಿದೆ. ಪ್ರತಿ ತೆನೆಗೆ ಸುಮಾರು ಸಾವಿರ ಕಾಳುಗಳ ಇಳುವರಿ, ಕೀಟನಿರೋಧಕ ಶಕ್ತಿಯುಳ್ಳದು, ಬೀಜೋತ್ಪಾದನೆಗೂ ಬಳಸಬಹುದಾದ ಈ ತಳಿ ಎಲ್ಲ ರೀತಿಯ ಮಣ್ಣು ಮತ್ತು ಹೆಚ್ಚಿನ ನೀರಿನ ಲಭ್ಯತೆಯಲ್ಲಿ ಬೆಳೆದು ಫಲ ನೀಡುತ್ತದೆ. ಸಂಶೋಧಕರು ಸಾಂಪ್ರದಾಯಿಕ ತಳಿಗಳ ವಿಶೇಷತೆಗಳನ್ನು ಸಂಯೋಜಿಸಿ ಈ ಭತ್ತವನ್ನು ಅಭಿವೃದ್ಧಿಪಡಿಸುತ್ತಿದ್ದಾರೆ.