ಸಾಮಾನ್ಯವಾಗಿ ಶನಿವಾರ–ಭಾನುವಾರ ಷೇರು ಮಾರುಕಟ್ಟೆಗೆ ರಜೆಯಾಗಿರುತ್ತದೆ. ಆದರೆ 2026ರ ಕೇಂದ್ರ ಬಜೆಟ್ ಮಂಡನೆಯ ಹಿನ್ನೆಲೆಯಲ್ಲಿ ಫೆಬ್ರವರಿ 1 ಭಾನುವಾರವಾಗಿದ್ದರೂ ಭಾರತೀಯ ಷೇರು ಮಾರುಕಟ್ಟೆಗಳು ಕಾರ್ಯನಿರ್ವಹಿಸಲಿವೆ. ಈ ಕುರಿತು BSE ಹಾಗೂ NSE ಜನವರಿ 16ರಂದು ಅಧಿಕೃತ ಪ್ರಕಟಣೆ ಹೊರಡಿಸಿದ್ದು, ಬಜೆಟ್ನ ಮಹತ್ವವನ್ನು ಪರಿಗಣಿಸಿ ಪೂರ್ಣ ಪ್ರಮಾಣದ ಲೈವ್ ಟ್ರೇಡಿಂಗ್ ಸೆಷನ್ ನಡೆಸಲು ನಿರ್ಧರಿಸಲಾಗಿದೆ. ಈ ದಿನ ಯಾವುದೇ ಮುಹೂರ್ತ ಟ್ರೇಡಿಂಗ್ ಅಲ್ಲದೆ, ಸಾಮಾನ್ಯ ದಿನಗಳಂತೆಯೇ ಬೆಳಗ್ಗೆ 9:15ರಿಂದ ಮಧ್ಯಾಹ್ನ 3:30ರವರೆಗೆ ವಹಿವಾಟು ನಡೆಯಲಿದೆ. ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಫೆಬ್ರವರಿ 1ರಂದು ಬೆಳಗ್ಗೆ 11 ಗಂಟೆಗೆ ಸಂಸತ್ತಿನಲ್ಲಿ 2026ರ ಬಜೆಟ್ ಮಂಡಿಸಲಿದ್ದು, ಇದು ಅವರ ಸತತ ಒಂಬತ್ತನೇ ಬಜೆಟ್ ಆಗಿರುತ್ತದೆ. ಬಜೆಟ್ ಘೋಷಣೆಗಳೊಂದಿಗೆ ಮಾರುಕಟ್ಟೆಯಲ್ಲಿ ತಕ್ಷಣದ ಏರಿಳಿತ ನಿರೀಕ್ಷಿಸಲಾಗಿದ್ದು, ಹೂಡಿಕೆದಾರರಿಗೆ ತಕ್ಷಣ ಪ್ರತಿಕ್ರಿಯಿಸುವ ಅವಕಾಶ ದೊರೆಯಲಿದೆ. ಹಿಂದೆಯೂ 2015, 2020 ಮತ್ತು 2025ರಲ್ಲಿ ಬಜೆಟ್ ದಿನ ವಾರಾಂತ್ಯ ಬಂದಾಗ ಮಾರುಕಟ್ಟೆ ತೆರೆಯಲಾಗಿತ್ತು. ಈ ಬಾರಿ ಕೂಡ ಬಂಡವಾಳ ಲಾಭ ತೆರಿಗೆ, ಎಲ್ಟಿಸಿಜಿ ದರ, ಎಸ್ಟಿಟಿ ಇಳಿಕೆ ಸೇರಿದಂತೆ ಹೂಡಿಕೆದಾರ ಸ್ನೇಹಿ ಘೋಷಣೆಗಳ ನಿರೀಕ್ಷೆ ಹೆಚ್ಚಾಗಿದೆ.
About the Author
