ಧಾರವಾಡ: ರಾಜ್ಯ ಸರ್ಕಾರ ಜೂನ್ 21ರಿಂದ ಜುಲೈ 10ರವರೆಗೆ ಸಂಚಾರ ನಿಯಮ ಉಲ್ಲಂಘನೆ ಪ್ರಕರಣಗಳ ದಂಡಕ್ಕೆ ಶೇ.50 ರಿಯಾಯಿತಿ ಘೋಷಿಸಿರುವ ಹಿನ್ನೆಲೆಯಲ್ಲಿ ವಾಹನ ಸವಾರರು ತಮ್ಮ ಹಿಂದಿನ ಬಾಕಿ ದಂಡಗಳನ್ನು ಪಾವತಿಸಲು ಮುಂದಾಗಿದ್ದಾರೆ. ಈ ಹಿಂದೆ ಕೂಡ ಇದೇ ರೀತಿಯ ರಿಯಾಯಿತಿ ನೀಡಲಾಗಿದ್ದರಿಂದ ಸಾವಿರಾರು ವಾಹನ ಮಾಲೀಕರು ಕಡಿತ ದರದಲ್ಲಿ ದಂಡ ಪಾವತಿಸಿ ಉಳಿತಾಯ ಮಾಡಿಕೊಂಡಿದ್ದರು. ಈ ಬಾರಿಯೂ ಜನರು ದೊಡ್ಡ ಸಂಖ್ಯೆಯಲ್ಲಿ ದಂಡ ಕಟ್ಟಲು ಬರುತ್ತಿದ್ದರೂ, ತಾಂತ್ರಿಕ ದೋಷದಿಂದಾಗಿ ರಿಯಾಯಿತಿ ವ್ಯವಸ್ಥೆಯಲ್ಲೇ ಗೊಂದಲ ಉಂಟಾಗಿದೆ.
ಸಂಚಾರ ಪೊಲೀಸರ ವ್ಯವಸ್ಥೆಯಲ್ಲಿ ಒಂದು ವಾಹನದ ಎಲ್ಲಾ ಪ್ರಕರಣಗಳಿಗೆ ರಿಯಾಯಿತಿ ಅನ್ವಯವಾಗದೆ, ಕೆಲವು ಪ್ರಕರಣಗಳಿಗೆ ಮಾತ್ರ ಶೇ.50 ರಿಯಾಯಿತಿ ತೋರಿಸುತ್ತಿದೆ. ಉದಾಹರಣೆಗೆ, ಒಂದೇ ವಾಹನದ ಮೇಲೆ ಎಂಟು ಪ್ರಕರಣಗಳಿದ್ದರೆ, ಟ್ರಾಫಿಕ್ ಸಿಗ್ನಲ್ ಜಂಪ್ ಮಾಡಿದ ನಾಲ್ಕು ಪ್ರಕರಣಗಳಿಗೆ ರಿಯಾಯಿತಿ ಕಾಣಿಸುತ್ತಿದ್ದರೂ, ಹೆಲ್ಮೆಟ್ ಧರಿಸದೇ ವಾಹನ ಚಲಾಯಿಸಿದ ಉಳಿದ ನಾಲ್ಕು ಪ್ರಕರಣಗಳಿಗೆ ಪೂರ್ಣ ದಂಡವೇ ತೋರಿಸುತ್ತಿದೆ. ಇದರಿಂದ ವಾಹನ ಮಾಲೀಕರು “ಸರ್ಕಾರ ಘೋಷಿಸಿದ ರಿಯಾಯಿತಿ ಎಲ್ಲ ಪ್ರಕರಣಗಳಿಗೂ ಅನ್ವಯವಾಗಬೇಕಲ್ಲವೇ?” ಎಂದು ಪ್ರಶ್ನಿಸುತ್ತಿದ್ದರೆ, ಎಷ್ಟು ದಂಡ ವಸೂಲಿ ಮಾಡಬೇಕು ಎಂಬ ಗೊಂದಲದಲ್ಲಿ ಪೊಲೀಸರು ಸಿಲುಕಿದ್ದಾರೆ.
ಇನ್ನೊಂದು ಸಮಸ್ಯೆ ಎಂದರೆ, ಮೇ ತಿಂಗಳಲ್ಲೇ ಸರ್ಕಾರ ರಿಯಾಯಿತಿ ನೀಡುವ ನಿರ್ಧಾರ ಕೈಗೊಂಡಿದ್ದರೂ, ಮೇ ಬಳಿಕ ದಾಖಲಾದ ಕೆಲವು ಪ್ರಕರಣಗಳಿಗೆ ಶೇ.50 ರಿಯಾಯಿತಿ ಅನ್ವಯವಾಗುತ್ತಿಲ್ಲ. ಒಂದು ಬಾರಿ ಟ್ರಾಫಿಕ್ ಪೊಲೀಸ್ ದಾಖಲೆಗಳಲ್ಲಿ ದಂಡ ನಮೂದಾದ ಬಳಿಕ ಅದನ್ನು ತೆಗೆಯಲು ಸಾಧ್ಯವಿಲ್ಲದ ಕಾರಣ, ಜನರು ಈ ಅವಕಾಶವನ್ನು ಬಳಸಿಕೊಳ್ಳಲು ಮುಂದಾಗಿದ್ದಾರೆ. ಆದರೆ ಕಳೆದ ವಾರದವರೆಗೆ ಇಂಟರ್ನೆಟ್ ಸಮಸ್ಯೆಯಿಂದ ದಂಡ ಸಂಗ್ರಹದಲ್ಲಿ ತೊಂದರೆ ಎದುರಿಸಿದ್ದ ಪೊಲೀಸರಿಗೆ ಈಗ ರಿಯಾಯಿತಿ ವ್ಯವಸ್ಥೆಯ ತಾಂತ್ರಿಕ ದೋಷವೇ ಹೊಸ ತಲೆನೋವಾಗಿದೆ.
ಧಾರವಾಡ ಸೇರಿದಂತೆ ನಗರಗಳಲ್ಲಿ ಜನರು ಆದಷ್ಟು ಬೇಗ ದಂಡ ಪಾವತಿಸಿ ದಂಡಮುಕ್ತರಾಗಲು ಬಯಸುತ್ತಿದ್ದರೂ, ತಾಂತ್ರಿಕ ಅಡಚಣೆಗಳಿಂದ ಪ್ರಕ್ರಿಯೆ ವಿಳಂಬವಾಗುತ್ತಿದೆ. ಹೀಗಾಗಿ ಸಂಬಂಧಪಟ್ಟ ಇಲಾಖೆ ತಕ್ಷಣ ಸಮಸ್ಯೆ ನಿವಾರಣೆ ಮಾಡಬೇಕು ಹಾಗೂ ಜುಲೈ 10ಕ್ಕೆ ನಿಗದಿಪಡಿಸಿರುವ ರಿಯಾಯಿತಿ ಗಡುವನ್ನು ಮತ್ತಷ್ಟು ದಿನ ವಿಸ್ತರಿಸಬೇಕು ಎಂಬ ಆಗ್ರಹ ಸಾರ್ವಜನಿಕರಿಂದ ಕೇಳಿಬರುತ್ತಿದೆ.
About the Author
